લઈ બેઠો છે
દરેક માનવી મનમાં કોઈ છુપી વાત લઈ બેઠો છે,
વર્તમાન સાથે ભૂતભવિષ્યનો ઝંઝાવાત લઈ બેઠો છે,
કોઈના મુખનું તેજ જોઈ આમ તું અંજાઈશ નહિ,
શું ખબર આપણને, મનમાં કોઈ અંધારી રાત લઈ બેઠો છે,
કોઈના હાસ્ય પરથી ના માપ એની જિંદગીનું આનંદપણું
છાતી ચીર તો જોવા મળે કે કોઈ હૃદયમાં ઘાત લઈ બેઠો છે,
પ્રોત્સાહન માટે, એક હાથે જે થપથપાવે પીઠ બીજાની,
એમ બને કે ખુદને હિંમત આપવા બીજાનો હાથ લઈ બેઠો છે,
ક્યાંથી અસર થાય કોઈનો એકાદ દુઃખી પ્રસંગ સાંભળીને,
ખુદના જખ્મોને બાળી જાણે રાખની મુલાકાત લઈ બેઠો છે,
દરેક માનવી મનમાં કોઈ છુપી વાત લઈ બેઠો છે,
વર્તમાન સાથે ભૂતભવિષ્યનો ઝંઝાવાત લઈ બેઠો છે.
- નિશાંક મોદી